نفسى ام الشيطان
حبيبي اللي بحبه وفى القلب قاعد ومتغطي ببطانية , بكتب ليك يا نور عيني , يا اللي مافكرتش ولو مره طول عمرك كله إنك تعرفني أو حتى تتشجع وتواجهني , طبعا مش عارف أنا مين, دلوقتى انا فرحان لأنك بديت تبقى مش مرتاح وحاسس بيك دلوقتى مليان فضول , بص ياروحى وركز فى كلامى علشان تعرفنى , ولا أقول لك ماتيجى نلعب عروستى ؟!
أنا اللى خليتك عن ربك تبعد بعيد , تخسر أهلك وصحابك , فاكر لما قلت لك هأضيعك وقلت لى موافق وإنت ماشى عميان ومش شايف ..
ضحكت عليك كتير... خليتك تضيع وتبص لنفسك فى المرايه تقول انا مين , إوعى تلومنى ارجوك مش انت اللى حبيت تمشى ورى كلامى بمزاجك
انا على فكره مظلوم ومش حاسيبك ترمى ذنوبك على .. كفايه ياعم اللى انا فيه , ده انا على فكره غلبان ولاانتم كلكم على ولا ايه ؟؟!!
شايف فى عينيك كلمة اكيد هو الشيطان .. طب وليه مابقاش نفسك ؟؟؟
ياسلام على خليتك مليان حيره وغضب ....
بس تعرف ياصاحبى إنك مش من النوع اللى بيعجبنى لانك ضعيف وكنت سهل جدا انى العب بيك
وانا بحب قوى الخصم العنيد الشديد...
وفى النهاية احب اقولك اوعى تفكرها فعلا النهاية
انا مش حاسيبك انا هافضل زى ضلك يانور عينى والسلام ختام